*
ફાગણની મોસમનો પહેલો કમાલ જુઓ,
લીલો હતો તે થયો ગુલમોર લાલ, જુઓ.
પહેલાં પર અટકી રે’ એ શું કમાલ, ભઈ?
ગુલમોરના નામે જુઓ, કેવી ધમાલ થઈ?
ગરમાળા પીળા થ્યા, કેસૂડા કેસરી,
આંબાને પાન-પાન લૂમઝૂમતી મંજરી,
આભેથી આગગોળા વરસ્યા કે વહાલ, જુઓ!
કોકિલ બદમાશ કેવો! આભમાં કંઈ ચીતરે છે,
તડકાની હારોહાર ટહુકાઓ નીતરે છે,
ખાલીપો ખખડે છે વગડાના કણકણથી,
અભરે ભરાય છે એ સારસના ક્રંદનથી,
મોસમની મહેફિલના નોખા સૂરતાલ જુઓ…
સઘળું રંગાયું તો માણસ શેં બાકી રહે?
ક્યાં લગ એ લાલ-પીળા-ભગવાને તાકી રહે?
ફાગણના વાયુ સંગ કેવો આ નાતો છે?
બહારથી વિશેષ તો, ભઈ! ભીતરમાં વાતો એ,
હાથ હો કે હૈયું, છે સઘળું ગુલાલ, જુઓ…
– વિવેક મનહર ટેલર
(૨૬-૦૬-૨૦૨૨)
*
વાહ ખુબસરસ ગીત
વાહ
પ્રેમનું લાલ ગુલાબી ગીત.
વાહ.. સઘળું ગુલાલ
વાહ..ગરમાળો..
વાહ…ખૂબ જ સુંદર ને મજાનું ગીત…કમાલ, લાલ,ધમાલ,વહાલ,સૂરતાલ ને ગુલાલની સજીવારોપણની
કમાલ કવિ સહજ રીતે પ્રગટાવે છે…ગમતાં ગીતોમાંનું એક બની રહેશે…અભિનંદન વિવેકસર…
સરસ
આભેથી આગગોળા કે વહાલ……બહુ સરસ.
સરસ,
આભેથી આગગોળા કે વહાલ…..બહુ સરસ
આભેથી આગગોળા વરસ્યા કે વહાલ આંબાને પાન-પાન લૂમઝૂમતી મંજર વાહ વિવેક ભાઈ
મસ્ત.. સુંદર મજાનું ગીત
વાહ,, મોસમનું રંગીલું ગીત…
પ્રતિભાવનાર તમામ મિત્રોનો હૃદયપૂર્વક આભાર
ખૂબ જ જોરદાર,,,