શરતને વશ રહીને પ્રેમ? ના, નથી કરવો,
તું જાનથીય છે પ્યારી, છતાં નથી કરવો.

શ્વસન સિવાયનું સઘળું સમર્પી દઉં હું તને?
પ્રણયને આ રીતે મારે અદા નથી કરવો.

પ્રણયના સ્વાંગમાં સોદો? જવાબ એક જ છે –
નથી કર્યો, નથી કરનાર, જા, નથી કરવો.

સહજ બે જણ ભળે અન્યોન્યમાં તો વાંધો શું?
પ્રણયના નામે સ્વયંને ફના નથી કરવો.

કબૂલ કરીએ ઉભયને યથાવત્ – એ જ શરત,
બીજા કશાનો સ્વીકાર અન્યથા નથી કરવો.

સ્વયં સહજ જે સ્ફૂરે એ જ છંદ છે મારો,
લગાલગાનો કદી ગાલગા નથી કરવો.

વિવેક મનહર ટેલર
(૦૪-૦૮/૦૪/૨૦૨૧)