કવિતા ક્યાંથી આવે છે એ કોયડો તો સંસારની પહેલી કવિતા રચાઈ હશે ત્યારથી લગભગ વણઉકલ્યો જ રહ્યો છે… સામાન્યરીતે એક સવાલના ચાર વિકલ્પ અપાય અને એમાંથી કોઈ એક જ સાચો હોય, પણ કવિતાની સર્જનપ્રક્રિયાનો સવાલ ચાર વિકલ્પ સાથે પૂછી શકાય એમ નથી. આ સવાલનો જવાબ શોધવા માટે સો વિકલ્પ આપવા પડે અને બનવાજોગ છે કે આ સોએ સો વિકલ્પ સાચા હોય… કાવ્યસર્જનના રહસ્યસ્ફોટનું ઉખાણું મને પૂછવામાં આવે તો એના સો જવાબોમાંથી આગળા પડતો એક જવાબ છે – આપ સહુનો પ્રેમ… આપ સહુનો નિઃસ્વાર્થ અને નિર્વ્યાજ સ્નેહ મને સતત લખવા માટે પ્રેરતો આવ્યો છે… અને આ ઉષ્માના સહારે સહારે આજે આ વેબસાઇટના બે દાયકાની મજલ પૂરી થઈ…

આજથી વીસ વર્ષ પહેલાં આ સાઇટ શરૂ કરી ત્યારે અંદાજ નહોતો કે આ વેબસાઇટ સ્વરચિત ગુજરાતી કાવ્યોની સર્વપ્રથમ વેબસાઇટ બનશે…

ગુજરાતી ભાષાની સર્વપ્રથમ સ્વરચિત કાવ્યોની મારી વેબસાઈટ – શબ્દો છે શ્વાસ મારા ~ www.vmtailor.com – એક એક વરસ કરતાં કરતાં આપના સ્નેહ અને આશિષના બે દાયકા વીતી ગયા..…

વિગત વીસ વરસોમાં મેં એનું કર્યું એનાથી વિશેષ આ વેબસાઇટે મારું ઘડતર કર્યું છે એમ કહું તો એમાં અતિશયોક્તિ નથી. નિયમિતતાની સાથોસાથ એણે મને કટિબદ્ધતાના પાઠ પણ શીખવાડ્યા. એક-એકથી ચડિયાતા મિત્રો અપાવ્યા અને પુષ્પગુચ્છ અને કંટક –ઉભયને સમાનભાવે સ્વીકારતાં પણ શીખવ્યું.

૨૦ વર્ષ..
૭૫૦ થી વધુ રચનાઓ..
૧૬૫૦૦ થી વધુ પ્રતિભાવો…

શબ્દોને શ્વાસના દોરમાં પરોવી કાવ્ય રચતા રહેવાનો આ સિલસિલો શ્વાસ ચલે ત્યાં સુધી ચાલતો રહે એ જ ઇચ્છા છે…
આપ પણ સાથ નિભાવશો ને?

આભાર…

હાથમાં કલમ લઈને કાગળ પર છેલ્લી કવિતા ક્યારે લખી હશે એ યાદ નથી… ટેકનોલોજી એ હદે સદી ગઈ છે કે કવિતા હવે સીધેસીધી મોબાઇલમાં કે કમ્પ્યુટરના કી-બૉર્ડ પર જ લખાય છે. વરસે-બે વરસે એકાદવાર કવિતા છપાવવા માટે સામયિકોને મોકલતો હોઈશ… સામયિકોના રસ્તે થઈ આપ સહુ સુધી પહોંચવાના બદલે જે ટેકનોલોજી કાવ્યસર્જનનું ઉપાદાન બની છે, એનો જ હાથ ઝાલીને આપના સુધી પહોંચવું મને વધારે પસંદ પડે છે… અને આ પસંદગીને આજે એક એક કરતાં ઓગણીસ વરસ પૂરાં થયાં… જાણું છું કે આમાંનું કશું જ આપ સહુના એકધારા સ્નેહ અને સંગાથ વિના શક્ય જ નહોતું…

આપનો આ સ્નેહ અને સંગાથ કદમ કદમ પર બનાવી રાખજો…

૧૯ વર્ષ…
૭૦૦થી વધુ રચનાઓ..
૧૬૦૦૦ થી વધુ પ્રતિભાવો…

દર મહિનાના પહેલા અને ત્રીજા શનિવારે વેબસાઈટની મુલાકાત લેવાનું ચૂકશો નહીં…
વેબસાઇટની લિન્ક આપના મિત્રમંડળોમાં પણ મોકલજો. આભાર…

અસ્તુ!

ભાંખોડિયાભેર ચાલતું બાળક બે પગે ઊભું થાય, ચાલતું થાય, ટીન-એજમાં હૉર્મોન્સના ઘોડે સવારી કરતું થાય અને અંતે અઢાર પૂરાં કરી પાકટ વયનું થાય એ આખોય ઘટનાક્રમ એના જન્મદાતા માટે આનંદ અને ગર્વની યાત્રા સમો હોય છે…

ગુજરાતી ભાષાની સર્વપ્રથમ સ્વરચિત કાવ્યોની મારી વેબસાઈટ – શબ્દો છે શ્વાસ મારા ~ www.vmtailor.com – આજે અઢાર વર્ષ પૂરાં કરી વયસ્ક બની છે…

વીતેલા અઢાર વર્ષમાં મેં એનું કર્યું એનાથી વિશેષ આ વેબસાઇટે મારું ઘડતર કર્યું છે એમ કહું તો એમાં જરાય અતિશયોક્તિ નથી. નિયમિતતાની સાથોસાથ એણે મને કટિબદ્ધતાના પાઠ પણ શીખવાડ્યા. એક-એકથી ચડિયાતા મિત્રો અપાવ્યા અને પુષ્પગુચ્છ અને કંટક –ઉભયને સમાનભાવે સ્વીકારતાં પણ શીખવ્યું.

૧૮ વર્ષ..
૭૦૦ થી વધુ રચનાઓ..
૧૫૦૦૦ થી વધુ પ્રતિભાવો…

મારી આ સાહિત્યસફર પણ એટલે જ સંભવ બની છે કે મિત્રોએ મને ક્યાંય એકલો પડવા નથી દીધો… વાચકમિત્રોના એકધારા સ્નેહનો હું સદૈવ ઓશિંગણ રહીશ.

…શક્ય હશે ત્યાં સુધી આ સફર જારી જ રહેશે… હા, આપના અનવરત સાથની અપેક્ષા રહેશે… જોડે રહેજો રાજ…

આભાર.
વિવેક

‘ચિત્રલેખા’ના ૭૨મા વાર્ષિક અંકની વિશેષ પૂર્તિમાં ‘૫૧ ગૌરવવંતા ગુજરાતી’માં સ્થાન પામવા બદલ સમસ્ત ચિત્રલેખા પરિવારનો હૃદયપૂર્વક આભાર.

*

… કારણ કે આમાંનું કશું જ આપ સહુના એકધારા સ્નેહ અને સંગાથ વિના શક્ય જ નહોતું…

ગુજરાતી ભાષાની સર્વપ્રથમ સ્વરચિત કાવ્યોની આ વેબસાઈટ આજે સોળ વર્ષ પૂરાં કરી ષોડશી બની રહી છે ત્યારે મારી લાગણી વ્યક્ત કરવા માટે આભાર શબ્દ અતિવામણો અનુભવાય છે…

ગીત, ગઝલ, અછાંદસ, સોનેટ, મોનોઇમેજ, મુક્તક, હાઈકુ, નઝમ, અંજનીગીત, અનુવાદ, ત્રિપદી અને બાળકાવ્ય – આમાંથી કશું આપ સહુની અનવરત ઉષ્મા પામ્યા વિના સંભવ બન્યું ન હોત… પ્રારંભથી આજ દિન સુધી જે રીતે આપ સહુ મારી અડખે પડખે રહ્યાં છો, આગળ પણ એ જ રીતે મારી સાથે ને સાથે જ રહેશો એ જ અપેક્ષા…

દર મહિનાના પહેલા અને ત્રીજા શનિવારે વેબસાઈટની મુલાકાત લેવાનું ચૂકશો નહીં…

અસ્તુ!

*

*

ઓનલાઇન ગુજરાતી સાહિત્યના એકલહથ્થુ ભેખધારી અને પાયાના ખેલાડીઓમાં મોખરાના એક ગણી શકાય એવા મૃગેશ શાહ હવે આપણી વચ્ચે નથી….

મગજમાં લોહીની નસ ગંઠાઈ જવાના (Superior Sagittal and Cavernous Sinus Thrombosis) કારણે માત્ર પાંત્રીસ વર્ષની કુમળી વયે મૃગેશ પર વડોદરા ખાતે ગઈ ૨૦મીએ ન્યુરોસર્જરી કરવામાં આવી. સર્જરી બાદ મૃગેશની તબિયત કથળી. કોમામાંથી બહાર જ આવી ન શક્યા અને ૦૫/૦૬/૨૦૧૪ના રોજ બપોરે ૧૨.૧૫ કલાકે એમનું દેહાવસાન થયું…

ઓનલાઇન ગુજરાતી ગદ્ય તથા પદ્યના સહુથી વિશાળ ખજાના- રીડગુજરાતી.કોમનો આમ અકાળે અંત આવશે એવું કોણે ધાર્યું હોય ?

મિત્ર મૃગેશને ભાવભીની શ્રદ્ધાંજલિ…

*

મારા વેબ-મિત્રો માટે આ વિડિયો અહીં ઉપસ્થિત છે…

*

*

આપના પ્રતિભાવોની પ્રતીક્ષા રહેશે…

ગયા ડિસેમ્બરમાં મારા ગઝલસંગ્રહ “શબ્દો છે શ્વાસ મારા”ને ગુજરાતી સાહિત્ય પરિષદ તરફથી પુરસ્કાર મળ્યો. ડિસેમ્બર મહિનામાં જ આપ અત્યારે આ જે સાઇટ વાંચી રહ્યા છો એણે સાત વરસ પૂરા કર્યા અને આજે સોળમી માર્ચે મેં જિંદગીના બેતાળીસ વર્ષ પૂરા કરી તેતાળીસમા વર્ષમાં પ્રવેશ કર્યો… આ ત્રિવિધ ખુશીના પ્રસંગે મારા બંને પુસ્તકો અને ઑડિયો સીડીનો સેટ આપ સહુને લગભગ ૪૦% ડિસ્કાઉન્ટ સાથે મળી શકશે…

બંને પુસ્તકો તથા ઑડિયો સીડીના સેટની કિંમત:

• ભારતમાં: રૂ. ૨૨૫ (રૂ ૩૫૦ના બદલે) (કુરિઅર તથા બેંક ચાર્જિસ સાથે)
• વિદેશમાં : $ ૧૧.૫ (પોસ્ટેજ ચાર્જ સાથે)

e-bay પરથી આ પુસ્તકો અને સીડી મંગાવવા માટે નીચે નામ ઉપર ક્લિક કરો:

• શબ્દો છે શ્વાસ મારા
• ગરમાળો
• અડધી રમતથી 

પુસ્તક અને ઑડિયો સીડીનું પ્રાપ્તિસ્થાન:

સુરત :

• આયુષ્ય હૉસ્પિટલ અને કાર્ડિયાક સેન્ટર, 47, સ્વીટી સૉસાયટી, ઉમાભવનની ગલીમાં, ભટાર રોડ.  (9824125355)

અમદાવાદ:

• રચના પ્રશાંત શાહ: 32, રમેશ પાર્ક સૉસાયટી, પંચશીલ બસ સ્ટેન્ડ પાસે, ઉસ્માન પુરા. (079-27561084)

મુંબઈ:

• મીના છેડા, ગોરેગાંવ. (9930177746)

અમેરિકા:

• શાર્દૂલ પંડ્યા:  ડેટ્રોઇટ: misspandya@hotmail.com, 001-586-264-0388
• જયશ્રી ભક્ત, સાન ફ્રાન્સિસ્કો, કેલિફોર્નિયા:  write2us@tahuko.com
• મોના નાયક, ન્યૂ જર્સી : urminosaagar@yahoo.com

*

પ્રિય મિત્રો,

સમાચાર આનંદના હોય અને આપ સાથે એ વહેંચવાના ન હોય તો એ આનંદ સાવ અધૂરો ન લાગે? છેલ્લા સાત-સાત વર્ષોથી ઇન્ટરનેટના માધ્યમ વડે આપ સહુ સ્નેહીજનો સાથે એવો તો દિલી નાતો બંધાઈ ગયો છે કે જાણે આખીય નેટ-ગુર્જરી મને મારો પોતાનો પરિવાર જ લાગે છે…

સુરત ખાતે હાલમાં ગુજરાતી સાહિત્ય પરિદનું સત્તાવીસમું અધિવેશન – જ્ઞાનસત્ર- ચાલી રહ્યું છે.

ગઈ કાલે આ જ્ઞાનસત્રના પ્રથમ દિવસે ગુજરાતી સાહિત્ય પરિષદ તરફથી “પ્રથમ સર્જનાત્મક પુસ્તક”નું વર્ષ ૨૦૧૧ માટેનું પારિતોષિક પરિષદના પ્રમુખશ્રી વર્ષા અડાલજાના વરદ હસ્તે મારા ગઝલસંગ્રહ “શબ્દો છે શ્વાસ મારા” માટે એનાયત થયું….

આપ સહુ મિત્રોનો અનવરત સ્નેહ જ મારી આ વેબસાઇટ અને એ દ્વારા ગઝલસંગ્રહ સ્વરૂપે પ્રકાશિત થઈ શક્યો છે… આથી આ પુરસ્કાર હું આપ સહુને જ અર્પણ કરું છું…

આભાર !

વિવેક