મુક્તક – શબ્દો છે શ્વાસ મારા

તું હતી?

વિવેક — Fri, 05 Jun 2026 20:00:00 +0000

હું… તું… આપણે…. …ભરતપુર ફેબ્રુઆરી 2025

શું હતું એ? બે ઘડી?
બે ઘડી? કે જિંદગી?
આપણે… બસ, આપણે…
હું તો નહોતો. તું હતી?

– વિવેક મનહર ટેલર
(૦૩-૦૧-૨૦૨૧)

કો’કનો દિ’ વાળીએ…

વિવેક — Wed, 30 Oct 2024 20:30:00 +0000

નક્કી કરીએ આ જ આ દિવાળીએ-
માત્ર ઘર નહિ, ખુદને પણ અજવાળીએ;
કોઈની આંખોનાં આંસુ ખાળીએ,
છે દિવાળી, કો’કનો દિ’ વાળીએ…

– વિવેક મનહર ટેલર

રાત-દહાડો વાંચવાથી શું થશે ?

વિવેક — Sat, 20 Apr 2024 05:16:09 +0000

*
રાત-દહાડો વાંચવાથી શું થશે ?
વ્યર્થ ફીફાં ખાંડવાથી શું થશે ?
જ્ઞાન જે વર્તનમાં છલકાતું નથી,
એના ભ્રમમાં રાચવાથી શું થશે ?

– વિવેક મનહર ટેલર
(૨૨/૦૨/૨૦૨૪)
*

કોઈનો દિ‘ વાળીએ…

વિવેક — Sat, 06 Nov 2021 02:58:33 +0000

નક્કી કરીએ આટલું દિવાળીએ
આપણી ભીતર છે એ અજવાળીએ,
કોઈની આંખોનાં આસું ખાળીએ,
છે દિવાળી, કોઈનો દિ’ વાળીએ…

– વિવેક મનહર ટેલર

હોવાપણું

વિવેક — Sat, 01 Feb 2020 06:07:26 +0000

હોવાપણું એથી વધુ શું નીકળે ?
એક બુંદ બીજા બુંદમાં જઈને ભળે;
છું બ્રહ્મ હું, બ્રહ્માય છું, બ્રહ્માંડ પણ,
શું શું નથી મારી ભીતર, કોણ એ કળે ?

– વિવેક મનહર ટેલર
(૧૪-૧૧-૨૦૦૬)

એ તારે કાજે છે…

વિવેક — Sat, 17 Aug 2019 07:06:38 +0000

કાલે હતો એથી વધારે આજે છે
દિલમાં એ રીતે દોસ્ત! તું બિરાજે છે;
ગંતવ્ય એક-એક શ્વાસનું એક જ છે કે-
જે પણ હતા, જે છે એ તારે કાજે છે.

– વિવેક મનહર ટેલર

ખીંટીની ઉપર…

વિવેક — Fri, 15 Sep 2017 19:30:51 +0000

(આગળ કે પાછળ? … ….જાંબુઘોડા, 2017)

સવાર-સાંજ દુવિધામાં તો ન રાખ મને,
વિચાર શું છે, જરા તો ચિતાર આપ મને;
ઉતારી ફેંક મને, જો પસંદ હોઉં નહીં,
પરંતુ ખીંટી ઉપર તો ન આમ ટાંગ મને.

– વિવેક મનહર ટેલર
(૧૧-૦૯-૨૦૧૭)

(સાથ-સાથ…. …ચાંપાનેર, 2017)

પળ હશે!

વિવેક — Sat, 21 Jan 2017 12:05:10 +0000

(ઉડ્ડયન…… …અલેપ્પી, કોચી, ડિસે., ૨૦૧૬)

કોણ જાણે, એના દિલમાં છળ હશે ?
કે પછી સંજોગનું કંઈ બળ હશે ?
ધાર્યું નહોતું કે સમયની જાળમાં-
‘એ ન આવે’ – માત્ર એવી પળ હશે!

– વિવેક મનહર ટેલર
(૦૧-૧૧-૨૦૧૦)

(એક અકેલા…. ….અલેપ્પી, કોચી, ડિસે., ૨૦૧૬)

એક પરપોટો

વિવેક — Sat, 15 Dec 2012 12:21:03 +0000

(ક્ષણિક…. ……દાલ સરોવર, કાશ્મીર, ૦૫-૨૦૧૨)

લાગણીનો માંડ્યો સરવાળો અમે ખોટો,
જ્યાં હતી આશા નફાની, ત્યાં મળ્યો તોટો;
એ ચિરંતન થાવાને જન્મ્યો જ નહોતો, દોસ્ત!
આપણો સંબંધ શું છે ? એક પરપોટો !

– વિવેક મનહર ટેલર
(૦૨-૦૯-૨૦૧૧)

(ભંગુર… …..પેન્સિલવેનિયા, અમેરિકા, ૧૩-૦૫-૨૦૧૧)

તુર્ત જ

વિવેક — Sat, 28 Jan 2012 05:00:26 +0000

(ફાટું ભરીને સોનું…. …સૂર્યોદય, નોર્થ રિમ, ગ્રાન્ડ કેન્યન, ૨૫-૦૫-૧૧)

સૂરજ ઢળતાં જ બદલાઈ જશે વાતાવરણ તુર્ત જ,
જશે જ્યાં તું, વિકટ થઈ પડશે મારે શ્વાસ પણ તુર્ત જ;
ભલે તું જાય છે પણ યાદ પરનો હક તો રહેવા દે,
‘સ્મરણ’ના ‘સ’ વિના તો થઈ જશે મારું ‘મરણ’ તુર્ત જ.

-વિવેક મનહર ટેલર
(૧૩-૧૨-૨૦૧૧)

(ગતિ અને ગંતવ્ય…. …રિપ્લી’સ બિલિવ ઇટ ઓર નૉટ, ન્યૂ યૉર્ક, ૧૬-૦૫-૧૧)