You are currently browsing વિવેક’s articles.
(પીળું સ્મિત… …ગરમાળો, મે, ૨૦૧૦)
* * *
સૂર્ય વીંઝતો
કોરડો, ગરમાળો
પીળુંક હાસ !
*
ફાગણ જેવી
આવી તું ને હું ફાટ્યો
કેસૂડા સમ.
*
ભરઉનાળે
ચોમાસું : મારા હોઠે
તારાં ચુંબન !
*
મરણ પણ
મરણને શરણ :
તારું સ્મરણ !
*
કવિતા : મૌન
કવિતા : શબ્દ અને
કવિતા : શૂન્ય
*
બેડરૂમમાં
હું છું, તું છે. આપણે ?
કે બસ ટી.વી. ?
-વિવેક મનહર ટેલર
(૧૦-૦૪-૨૦૧૩)
* * *
(ઇન ઉમ્ર સે લંબી સડકોં કો… …દુબઈ, રાત્રિ, નવે, ૨૦૧૨)
(અક્ષરની ગલીઓ… …દિરાંગ, નવેમ્બર, ૨૦૧૦)
*
તારા અક્ષરની ગલીઓમાં ઊંડે લપસ્યો કે મારા હાથે ચડી ગઈ તું,
ઠેઠ ભીતર અડી ગઈ તું.
જનમોજનમ પછી તારો કાગળ મને કોણ જાણે શી રીતે જડ્યો?
પહેલી મુલાકાત, પહેલો જ સ્પર્શ હોય એ રીતે હળવેથી અડ્યો.
અત્તર ઢોળાય રૂના તાર-તારે એમ મારા રુદિયે પડી ગઈ તું.
એક-એક અક્ષરની ડાળી પર ઝૂલ્યો હું, જેમ ઝુલતી તું મારી આંખમાં,
લગરિક અંતર પણ જો વચ્ચે વર્તાય તો આંખથી તું કહેતી કે ‘રાખ મા’.
ડાબા હાથે મૂકાયેલ કાગળ શું જડ્યો, આખેઆખી જડી ગઈ તું.
- વિવેક મનહર ટેલર
(૦૯-૦૨-૨૦૧૩)
*
(ચીન બૉર્ડર તરફ જતાં… …દિરાંગ, નવેમ્બર, ૨૦૧૦)
માય લૉર્ડ !
લગ્ન એટલે શું એ મને સમજાય છે.
હા, મેં જ છાતી ઠોકી ઠોકીને કહ્યું હતું,
હું તને પ્રેમ કરું છું.
ચાલ, લગ્ન કરી લઈએ.
અને મેં દસ વરસ કાઢી પણ નાખ્યા, માય લૉર્ડ !
કાઢી નાખ્યા, માય લૉર્ડ ! કાઢી નાખ્યા…
જેમ આપ હથોડી ઠોકો છો
એમ જ મેં છાતી ઠોકી હતી.
યોર ઑનર !
લગ્ન એટલે શું એ હવે મને સમજાય છે.
- વિવેક મનહર ટેલર
(૦૭-૦૨-૨૦૧૩)
(અલ્લાહનો વારસો…. …અરુણાચલ, નવે-૨૦૧૦)
*
વારસામાં જે મળ્યું તે બેય હાથે લઈ લીધું,
છું મજામાં, જે મળ્યું તે બેય હાથે લઈ લીધું.
ભાનમાં છું એ ખબર પડતાં જ આશાઓ વધે,
મેં નશામાં જે મળ્યું તે બેય હાથે લઈ લીધું.
આ નથી ને તે નથીની વાત પર દુર્લક્ષ દઈ
મેં બધામાં જે મળ્યું તે બેય હાથે લઈ લીધું.
આપવા બેઠો તો મેં છાતી ચીરીને આપ્યું ને
સામનામાં જે મળ્યું તે બેય હાથે લઈ લીધું.
લોકને પાછળ મૂકી હું મોખરે રહ્યો કે મેં
આયખામાં જે મળ્યું તે બેય હાથે લઈ લીધું.
સંભવે જો આ યુગે તો આ રીતે જ એ ચીખશે:
હેં સુદામા, જે મળ્યું તે બેય હાથે લઈ લીધું ?
-વિવેક મનહર ટેલર
(૨૬-૦૨-૨૦૧૩)
*
(બેય હાથે… …સ્નેક બર્ડ, નામેરી, આસામ, નવે-૨૦૧૦)
(કાંટા… …આસામ, નવે-૨૦૧૦)
*
તેં કહ્યું હતું -
તું આવશે
અને
આલિંગન આપશે.
…
..
.
હવે ન આવીશ.
ભૂલેચૂકે પણ ન આવીશ.
મારી છાતીમાં
કાંટા બનીને
ચસોચસ ખૂંપી ગયું છે,
ન આપી શકાયેલું એ આલિંગન.
ક્યાંક
તું
ચિ-રા-ઈ ન જાય !
-વિવેક મનહર ટેલર
(૨૪-૦૩-૨૦૧૩)
*
(રસ્તે વિલસતું સૌંદર્ય…. …આસામ, નવે-૨૦૧૦)
(કાળજાંના ફૂલ… ….અરુણાચલ પ્રદેશ, નવેમ્બર, ૨૦૧૦)
*
ના, નહીં આવું, મળવાને નહીં આવું,
જે મારગથી તારી હો આવન-જાવન, એ મારગને મારગમાં નહીં લાવું.
કાળજાના ફૂલડાને પથ્થર બનાવવાનું કામ કેવું કપરું છે, કાના ?
પણ એકવાર નક્કી કરી જ દીધું હોય પછી ડગ પાછા ભરવાના શાના ?
જાદુની વાત નથી, હૈયાને રોજ-રોજ પળ-પળ હું આવું સમજાવું.
ના, નહીં આવું, મળવાને નહીં આવું…
તારી આગળ તો આખી દુનિયા પડી છે ને મારી તો દુનિયા બસ, તું !
આયનાની સામે છો કલ્લાકો કાઢું પણ જડતી નથી મને ‘હું’.
સાન-ભાન ભૂલી પણ એટલું નહીં કે મારા હોવાની યાદ હું કરાવું.
ના, નહીં આવું, મળવાને નહીં આવું…
લિખિતંગ રાધાના ઝાઝા જુહાર, ભલે આંખો આ થાય નહીં ચાર,
મનડું પાણીની જેમ તારામાં ઢોળાયું, તનડાનો શાને વિચાર ?
ના, ના, રિસાઈ નથી, પ્યાર છે આ પ્યાર છે પણ તને હું કેમ સમજાવું ?
જા, નહીં આવું, નહીં આવું, નહીં આવું…
- વિવેક મનહર ટેલર
(૧૨-૦૧-૨૦૧૩)
*
(એ રસ્તો…. ….નામેરી બર્ડ સેન્ક્ચ્યુરી, અરુણાચલ, નવે-૧૦)
(એક કવિતા આ પણ… …ગિરનાર, ૨૫-૦૨-૨૦૧૩)
*
કેટલીક કવિતા ક્યારેક અન્ય કવિતા વાંચતા કે કોઈ સાથે વાતચીત કરતાં ઉદભવતી જણાય છે.. લયસ્તરો પર ગઈ કાલે મૂકેલી “એક ગેઈશાનું ગીત” કાવ્ય એક મિત્રને સંભળાવ્યું અને એનો જે પ્રતિભાવ આવ્યો એ આ કાવ્યનું બીજ છે.. ગેઈશાનું ગીત જ્યાં પૂરું થાય છે ત્યાંથી મારી કવિતા કદાચ શરૂ થાય છે…
*
ક્યારેક
એકાદ રાત તો તને એવી મળી આવે છે
જ્યારે
આખી દુનિયાથી દૂર
સા…વ એકલી
તું તારા આંસુને સંભોગી શકે છે…
પાંજરામાં પૂરેલા સિંહનો શિકાર કરે એ રીતે
ઘરાક તારા ચામડાં ચૂંથીને ચાલ્યો જાય
ત્યારે
કામ સે કમ
પૈસાની સાથે
તારા પગભર હોવાનો સિક્કો તો ખણકાવી જાય છે.
બે ઘડી તો બે ઘડી
એ આખેઆખો તારો બની રહે છે…
તું ભલે લાખ ગુલામ…
ભલે લાખ અપમાનિત…
તોય તને એકાદ રાત તો મળી આવે છે…
મારું પૂછે છે?
હું?
હું તો ગૃહિણી છું, બસ…
હા, ગૃહિણી…
- વિવેક મનહર ટેલર
(૦૨-૦૪-૨૦૧૩)
*
(ખોરાક… …અમેરિકા, મે, ૨૦૧૧)
(પછીતેથી… …બહાઉદ્દીન મકબરા, જૂનાગઢ, ૨૫-૦૨-૨૦૧૩)
*
તને ખોટું તો નથી લાગતું ને, યાર ?
રોજ જ
જ્યારે જ્યારે
હું તારા ઘર પાસેથી
-એ તારું ઘર જ છે ને?-
પસાર થાઉં છું
ત્યારે ત્યારે
ચાલુ ગાડીએ
અને ચાલુ મોબાઇલે
બે ઘડી
હાથ સહેજ છાતીએ અડાડીને
અને
માથું બે’ક ડિગ્રી નમાવીને
આંખ એકાદ પલભર બંધ કરી લઉં છું.
તારા ઘર પાસે
- એ તારું જ ઘર છે ને?-
ખાલી થોભાતું નથી, બસ…
સમય, પ્રભુ ! સમય…
-વિવેક મનહર ટેલર
(૧૯-૦૩-૨૦૧૩)
*
(વિહંગાવલોકન… …બહાઉદ્દીન મકબરા, જૂનાગઢ, ૨૫-૦૨-૨૦૧૩)
(હું ત્યાં ત્યાં છું, તું જ્યાં જ્યાં છે…. …ગ્રાન્ડ કેન્યન, એરિઝોના, ૨૦૧૧)
*
અંજની-ત્રિવેણીનો આ ત્રીજો અને આખરી પ્રવાહ… આલિંગનનો રોમાંચ, એનું મીઠું સ્મરણ- આ બધું ઓગળી- ઓળંગી ગયા પછી ? જ્યારે કશું ન રહે એ ક્ષણ જ પ્રેમના સાક્ષાત્કારની ક્ષણ છે…
૦૩.
પગની નીચે ધરતી ક્યાં છે ?
હું ત્યાં ત્યાં છું, તું જ્યાં જ્યાં છે,
પ્રેમની મારા મનમાં, પ્રિયતમ !
. બસ, આ વ્યાખ્યા છે.
ક્યા પાયા હૈ, ક્યા થા બોયા ?
જ્યોં જ્યોં પાઉં, ત્યોં ત્યોં ખોયા,
સફળ મનોરથ, સકળ તીરથ મેં
. તારામાં જોયા.
-વિવેક મનહર ટેલર
(૧૦-૦૨-૨૦૧૩)
*
(હું મને ક્યાંય પણ જડતી નથી… …કચ્છ, ૨૦૦૯)
સામાન્ય રીતે વર્ષગાંઠ પર ભેટ મેળવવાનો રિવાજ છે… મારે આપવી છે… (આંશિક ભેટ, હં કે!)
ગયા ડિસેમ્બરમાં મારા ગઝલસંગ્રહ “શબ્દો છે શ્વાસ મારા”ને ગુજરાતી સાહિત્ય પરિષદ તરફથી પુરસ્કાર મળ્યો. ડિસેમ્બર મહિનામાં જ આપ અત્યારે આ જે સાઇટ વાંચી રહ્યા છો એણે સાત વરસ પૂરા કર્યા અને આજે સોળમી માર્ચે મેં જિંદગીના બેતાળીસ વર્ષ પૂરા કરી તેતાળીસમા વર્ષમાં પ્રવેશ કર્યો… આ ત્રિવિધ ખુશીના પ્રસંગે મારા બંને પુસ્તકો અને ઑડિયો સીડીનો સેટ આપ સહુને લગભગ ૪૦% ડિસ્કાઉન્ટ સાથે મળી શકશે…
બંને પુસ્તકો તથા ઑડિયો સીડીના સેટની કિંમત:
e-bay પરથી આ પુસ્તકો અને સીડી મંગાવવા માટે નીચે નામ ઉપર ક્લિક કરો:
પુસ્તક અને ઑડિયો સીડીનું પ્રાપ્તિસ્થાન:
સુરત :
અમદાવાદ:
મુંબઈ:
અમેરિકા:
આપના અભિપ્રાયો