વિશ્વાસ ( આદ્યંતે* રદીફની ગઝલ )


(ચિત્રાંકન: ડૉ. કલ્પન પટેલ…                                        … સુરત)

*

વિશ્વાસ ક્યાં મળે છે કોઈ આંખમાં હવે ?
વિશ્વાસ ચોપડીમાં મળે વાંચવા હવે.

વિશ્વાસ ખટઘડી તણા સંભારણા હવે,
વિશ્વાસ દાદીમાની કોઈ વારતા હવે.

શોધો છો એ જીવન હવે મળશે નહીં કદી,
વિશ્વાસના આ ‘વિ’ વિનાના શ્વાસમાં હવે.

ફાવી ગયું બધાયને ઘર બહાર ઝાંપે છે…ક
‘વિશ્વાસ’ નામ કોતરી શણગારતાં હવે.

તારી ને મારી વચ્ચેનું અંતર, કહું ? શું છે?
વિશ્વાસના ન હોવાની સંભાવના હવે.

છો, શ્વાસ જ્યાં નિઃશ્વાસ મૂકે, શબ્દ નીકળે,
વિશ્વાસના વજન વિના શું કામના હવે

-વિવેક મનહર ટેલર

(આદ્યંતે = બંને છેડે. કાફિયાવાળી પંક્તિમાં બંને છેડે રદીફ – એક છેડે ‘વિશ્વાસ’ અને બીજા છેડે ‘હવે’ – રાખીને વિચારની સ્વતંત્રતાને લગીર અવરોધીને ગઝલ લખવાનો એક નાનકડો પ્રયોગ અહીં કરી જોયો છે.)

19 thoughts on “વિશ્વાસ ( આદ્યંતે* રદીફની ગઝલ )

  1. બહુ જ સરસ પ્રયોગ છે. શ્વાસ અને વિશ્વાસની આ શબ્દ રમત ગમી – પણ તેથી ઘણો વધુ આ ભાવ ગમ્યો.

  2. તારી ને મારી વચ્ચેનું અંતર, કહું ? શું છે?
    વિશ્વાસના ન હોવાની સંભાવના હવે.

    – ખરી વાત !

  3. સુંદર!
    ડૉ.માનવજીવવિજ્ઞાનમાં હું તો ક્યારેય પણ
    હ્ર્દયમાં કે આંખમાં વિશ્ર્વાસના અસ્તિત્વ
    વિશે ભણ્યો નથી.
    વૃક્ષો અને લગ્નો ટકી રહે છે. એટલે ક્યાંક તો
    એ વિશ્વાસ છે જ.
    કિરીટ.

  4. “તારી ને મારી વચ્ચેનું અંતર, કહું ? શું છે?
    વિશ્વાસના ન હોવાની સંભાવના હવે.”

    ખૂબ જ સુંદર ભાવ…!!

    વિશ્વાસ દેખાય શ્રદ્ધામાં ક્યાંથી હવે?
    વિશ્વાસમાં પણ રહી ન શ્રદ્ધા હવે!!

    ઊર્મિસાગર

  5. તારી ને મારી વચ્ચેનું અંતર, કહું ? શું છે?
    વિશ્વાસના ન હોવાની સંભાવના હવે.

    પ્રિય મિત્ર વિવેક,

    તારી ગજલને નમે છે સદાય મારુ મૌન.

    મીના

  6. વાહ!

    શોધો છો એ જીવન હવે મળશે નહીં કદી,
    વિશ્વાસના આ ‘વિ’ વિનાના શ્વાસમાં હવે.

    સુંદર રચના થઈ છે વિવેકભાઈ,
    -અભિનંદન.

  7. તારી ને મારી વચ્ચેનું અંતર, કહું ? શું છે?
    વિશ્વાસના ન હોવાની સંભાવના હવે.
    ………..

Leave a Reply to ધવલ Cancel reply

Your email address will not be published. Required fields are marked *