જળાશયમાં

P8149008
(ઝળહળાં જળાશય….                           …શબરીધામ, ૧૪-૦૮-૨૦૦૯)

*

શબ્દની એક કાંકરી ઊડી, આપણા મૌનના જળાશયમાં,
લીલના યુગયુગોના અંધારાં, થઈ ગયાં ઝળહળાં જળાશયમાં.

છાતીના ઓરડામાં ડૂમાઓ કાયમી ઘર જમાવી બેઠા છે,
બારી સહુ મુશ્કેટાટ બંધ સદા, ખુલે બસ, બારણાં જળાશયમાં.

રેતનો એક એક-કણ તળનો ,બસ ! પ્રતીક્ષા અને ઝુરાપો છે,
વાદળો દૂર દૂર ક્યાંય નથી, પાણી પણ છે જ ક્યાં જળાશયમાં ?

પાણી દેખાડું મારું એ પહેલાં પાણી પાણી જ થઈ જવાયું છે,
આપ સામે ફરક રહે જ છે ક્યાં, મારા આશય તથા જળાશયમાં ?

ભેંસની પીઠની સવારીઓ, વડની ડાળીની ચિચિયારીઓ;
કાળના થર ચડી ગયા એ પછી ના જડ્યા ગામના જળાશયમાં ?

પાણી પાણી જ હોય છે એ છતાં, પાણી પાણીમાં છે ફરક કેવો ?
માપસરનું મળત તો વૃક્ષ બનત, કાષ્ઠ કોહી ઊઠ્યાં જળાશયમાં.

પ્રશ્ન હજ્જારો ઊભ્ભા મોલ સમા ઊગી આવ્યા’તા મારી આંખોમાં,
આપે પાંપણ જરાક ઊઠાવી, ડૂબ્યા સૌ સામટા જળાશયમાં.

– વિવેક મનહર ટેલર
(૧૩-૧૦-૨૦૦૯/૧૯-૦૩-૨૦૧૦)

  1. Rajendra M. Trivedi,M.D.’s avatar

    પ્રિય વિવેક,

    સુન્દર કવિતા………આ પઁક્તી ઓ દિલને ગમી…..

    “શબ્દની એક કાંકરી ઊડી, આપણા મૌનના જળાશયમાં,
    લીલના યુગયુગોના અંધારાં, થઈ ગયાં ઝળહળાં જળાશયમાં.
    પ્રશ્ન હજ્જારો ઊભ્ભા મોલ સમા ઊગી આવ્યા’તા મારી આંખોમાં,
    આપે પાંપણ જરાક ઊઠાવી, ડૂબ્યા સૌ સામટા જળાશયમાં.”

    રાજેન્દ્ર ત્રિવેદી

    Reply

  2. રાજેશ જોશી

    આપની આટલી સરસ ગઝલ વાંચીને એક ‘તઝમીન’ લખવાનુ મન થઇ આવ્યુ…

    પાંપણના પોયણાંમાં અસ્રુબુંદ અચાનક આવી બેઠા છે,
    બે હોઠની પાંખડીએ મણમણના તાળા લગાવી બેઠા છે,
    હવે તો શ્વાસની ગતિ પણ સાવ અટકાવી બેઠા છે,
    છાતીના ઓરડામાં ડૂમાઓ કાયમી ઘર જમાવી બેઠા છે,
    બારી સહુ મુશ્કેટાટ બંધ સદા, ખુલે બસ, બારણાં જળાશયમાં.

    Reply

  3. હિમાંશુ કીકાણી’s avatar

    ગઝલ વિશે કંઇ પણ કહેવાનું મારું ગજું નથી, આપની તસવીરો હંમેશા આ સાઇટ પર ખેંચી લાવે છે!
    – હિમાંશુ

    Reply

  4. હેમંત પુણેકર’s avatar

    વિવેકભાઈ,

    આ બે શેર ખાસ થયા છે:

    રેતનો એક એક-કણ તળનો ,બસ ! પ્રતીક્ષા અને ઝુરાપો છે,
    વાદળો દૂર દૂર ક્યાંય નથી, પાણી પણ છે જ ક્યાં જળાશયમાં ?

    પ્રશ્ન હજ્જારો ઊભ્ભા મોલ સમા ઊગી આવ્યા’તા મારી આંખોમાં,
    આપે પાંપણ જરાક ઊઠાવી, ડૂબ્યા સૌ સામટા જળાશયમાં. …… વાહ!

    છાતીના ઓરડામાં.. અને પાણી દેખાડું મારું .. વાળા શેર સમજવામાં થોડાક અઘરા પડે છે.

    કાંકરીના ઊડવા કરતાં કાંકરીનું પડવું અને ઘર જમાવી બેઠા કરતાં ઘર બનાવી બેઠા કે ડેરો જમાવી બેઠા એવા શબ્દપ્રયોગ પ્રચલિત વાક્ પ્રચારોની વધુ નજીક આવશે એવું મને લાગે છે.

    અભિનંદન!

    Reply

  5. pragnaju’s avatar

    સુંદર કવિતા
    રેતનો એક એક-કણ તળનો ,બસ ! પ્રતીક્ષા અને ઝુરાપો છે,
    વાદળો દૂર દૂર ક્યાંય નથી, પાણી પણ છે જ ક્યાં જળાશયમાં ?

    પાણી દેખાડું મારું એ પહેલાં પાણી પાણી જ થઈ જવાયું છે,
    આપ સામે ફરક રહે જ છે ક્યાં, મારા આશય તથા જળાશયમાં ?

    ભેંસની પીઠની સવારીઓ, વડની ડાળીની ચિચિયારીઓ;
    કાળના થર ચડી ગયા એ પછી ના જડ્યા ગામના જળાશયમાં ?

    વાહ્
    માણતા માણતા …

    આવી પહોંચ્યું છે જળાશય આંખનું ; હું જાઉં છું;
    ને તમારે પણ અહીંથી પાછા વળવું જોઈએ.

    Reply

  6. Harikrishna’s avatar

    Khub saras. Tamari aa chata kevi mazani che.

    Reply

  7. indravadan g vyas’s avatar

    આસ્વાધ રચના.મને ખુબ ગમી.

    Reply

  8. Dr. Dinesh O. Shah’s avatar

    પ્રિય વિવેકભાઈ,

    નીચેની પંક્તિ ખુબજ ગમી. બહુજ મહાન સત્ય કહી દિધું. You are a very good observer!

    “પાણી પાણી જ હોય છે એ છતાં, પાણી પાણીમાં છે ફરક કેવો ?
    માપસરનું મળત તો વૃક્ષ બનત, કાષ્ઠ કોહી ઊઠ્યાં જળાશયમાં”

    બે લાઈનોમાં તમે કેમેસ્ટ્રી, એગ્રીકલ્ચર,ફીલોસોફી અને પોએટ્રી બધુ જ સમાવી દીધું છે! આવું જ
    creative લખતા રહો તેવી શુભેછાઓ.

    દિનેશ ઓ. શાહ, ડી ડી યુનિવરસીટિ, નડિયાદ, ગુજરાત, ભારત

    Reply

  9. urvashi parekh’s avatar

    ઘણી બધી વાતો કહી દીધી તમે વાત વાત માં,
    માપ સર નુ મળત તો વ્રુક્ષ બનત,
    કાષ્ઠ કોહી ઉઠ્યા છે જળાશય માં,
    બધી વાતો માં આજ વાત લાગુ પડતી હોય છે..
    ખરુ ને?
    સુન્દર..

    Reply

  10. સુનીલ શાહ’s avatar

    મઝાની ગઝલ..
    પ્રથમ અને અંતિમ શેર વિશેષ સ્પર્શી ગયાં.

    Reply

  11. Pancham Shukla’s avatar

    આ ગઝલ વિશે….
    – ગાલગા ગાલગા લગાગાગા-નાં બે આવર્તનવાળો અ(અલ્પ)-પ્રચલિત છંદ.
    – અનોખો અને અઘરો રદીફ – (જળાશયમાં), તો સાથે કાફિયાની મોકળાશથી અભિવ્યક્તિનો આગવો અવકાશ.
    – અનુભવી કલમની તાકાત અને તકનીકથી થયેલી શબ્દ ગૂંથણી દ્વારા રદીફને નીભાવવાનો કલાત્મક ઉદ્યમ.
    – અગાઉનું મુકતકાવ્ય ‘સાહસ’ જેટલું કુદરતી હતું એટલી જ આ ગઝલ તકનીકી રીતે મુજબૂત છે.
    – બન્ને પ્રકારની કાવ્યશૈલીઓ પર પ્રભુત્વ એ ઊંચા ગજાના કવિની લાક્ષણિકતાઓ છે.

    Reply

  12. preetam lakhlani’s avatar

    તમારી ગઝલ પણ ગમે છે, ગીત્ પણ ગમે છે……..કારણ નહી આપુ કારણ મને ગ મે છે….કદાચ આ કારણે પણ ગઝલ ગમી હોય્ ?.
    આપે પાંપણ જરાક ઊઠાવી, ડૂબ્યા સૌ સામટા જળાશયમાં.
    બહુજ સારી, સરસ્, ગમતાનો ગુલાલ્………

    Reply

  13. Lata Hirani’s avatar

    છાતીના ઓરડામાં ડૂમાઓ કાયમી ઘર જમાવી બેઠા છે,
    બારી સહુ મુશ્કેટાટ બંધ સદા, ખુલે બસ, બારણાં જળાશયમાં.

    આંખોના જળાશય કદી ન સુકાય્….

    Reply

  14. રઈશ્ મનીઆર’s avatar

    મજાની ગઝલ. સુંદર કસબ.

    રઈશ મનીઆર

    Reply

  15. kanchankumari parmar’s avatar

    કાંકરિચાળો એક પણ વમળ સર્જે અનેક જિવન જળાશયમા ,કસ્તિ સોંપુ કોને ?હોડી પુરેપુરિ જવા તત્પર જળાશય મા…..

    Reply

  16. Jignesh Adhyaru’s avatar

    પાણી પાણી જ હોય છે એ છતાં, પાણી પાણીમાં છે ફરક કેવો ?
    માપસરનું મળત તો વૃક્ષ બનત, કાષ્ઠ કોહી ઊઠ્યાં જળાશયમાં.

    ખૂબ સુંદર વિવેકભાઈ…..

    Reply

  17. Jayesh’s avatar

    છાતીના ઓરડામાં ડૂમાઓ કાયમી ઘર જમાવી બેઠા છે,
    બારી સહુ મુશ્કેટાટ બંધ સદા, ખુલે બસ, બારણાં જળાશયમાં.

    અમારી આંખોના જળાશયના દરવાજા ઘણીવાર તમારી કવિતા ખોલી નાખે છે.

    Reply

  18. P Shah’s avatar

    વાહ ! સુંદર રચના !

    શબ્દોની કસબભરી સુંદર ગુંથણી !

    Reply

  19. Niraj’s avatar

    વાહ.. અનુભવની માવજત પામેલી ગઝલ.. આ ગઝલ રણકાર માટે તમારા સ્વરમાં પઠન કરી આપશો મિત્ર??

    Reply

  20. sujata’s avatar

    આભ ની ઊંચા ઇ અને સ મું દ ર ની ગ હે રા ઈ મા પી શ કે એ ટ લું ગ જુ ફ ક ત આ પ નુ જ છે…….

    Reply

  21. Nirlep Bhatt’s avatar

    this is gem of the poem!……awesome and meaningful, indeed.

    Reply

  22. BHARGAVI’s avatar

    વિવેકભાઇ, મને એકને જ ગળામા ડૂમાઓ ભર્યા હોવાનો વહેમ આ વાચીને દૂર થયો, અને એની સાથે જ આ લખનાર તથા વાચનાર તમામ સાથે જાણે એ વેદનાની માળામા મણકાની જેમ હુ પણ પરોવાઇ.

    પાણી દેખાડું મારું એ પહેલાં પાણી પાણી જ થઈ જવાયું છે,
    આપ સામે ફરક રહે જ છે ક્યાં, મારા આશય તથા જળાશયમાં ? <= very romantic.

    Reply

  23. Daxesh Contractor’s avatar

    છાતીના ઓરડામાં ડૂમાઓ કાયમી ઘર જમાવી બેઠા છે… રેતનો એક એક-કણ તળનો, બસ ! પ્રતીક્ષા અને ઝુરાપો છે…. અને છેલ્લો શેર… વાહ ક્યા બાત હૈ. ખુબ જ સુંદર…

    Reply

  24. Smita Parekh’s avatar

    વિવેકભાઈ,
    વાહ્!!!! ખુબ સુન્દર ગઝલ.
    અંતિમ શેરમાં ડૂબી જવાનું ગમ્યું.

    Reply

  25. kishore modi’s avatar

    સુંદર ગઝલ

    Reply

  26. dhrutimodi’s avatar

    સુંદર શબ્દચિત્ર.
    ખાસ ગમેલી પંક્તિ…………
    પ્ર્શ્નો હજ્જારો ઊભ્ભા મોલ સમા ઊગી આવ્યા’તા મારી આંખોમાં,
    આપે પાંપણ જરાક ઊઠાવી,ડૂબ્યા સૉ સામટાં જળાશયમાં.

    Reply

  27. indravadan g vyas’s avatar

    કવિતા વાંચવાની મઝા એક વાત છે અને નીવડેલી કલમોના પ્રતિભાવો પણ મઝા આપનારા બની રહેછે.દા.ત. પંચમ શુક્લ નો અભ્યાસુ પ્રતિભાવ, કવિના ભાવ જગતની,કવિતાના વ્યાકરણની અને કવિતાની ખુબીઓની વાતો હમેશા મારા જેવા કાવ્ય રસિકો માટે રાહબર બને છે, કાવ્ય વધુ આસસ્વાદ્ય બને છે.

    Reply

  28. sudhir patel’s avatar

    સુંદર ગઝલ! ખાસ કરીને તો ‘જળાશયમાં’ જેવો તાજગી સભર રદીફ બખૂબી નિભાવાયો છે.
    સુધીર પટેલ.

    Reply

  29. મીના છેડા’s avatar

    ………

    Reply

  30. Akbar Lokhandwala’s avatar

    Too good and look within………………
    world within or i am world!!!!

    Reply

  31. bankim’s avatar

    આપનું આ જળાશય ઊંડે ક્યાંક સ્પર્શી ગયું.
    જોરદાર ગઝલ.

    Reply

  32. naresh dodia’s avatar

    હજારો પ્રર્શ્નો ઉભા થયા અને જળાસયો સુકાય ગયા,
    વિરહના નીરંતર તાપ થકી

    આંખલડી છલકાય ઉઠી છ્પ્પનિયા જેવા કારમા ઘાતથી.
    જળાસયો ફરીથી છલકાય ઉઠયા અમારા અશ્રુના સૈલાબ થકી.

    Reply

  33. chandrika’s avatar

    પ્રિય વિવેક ,
    તમે ખુબ જ સુન્દર ગઝલ લખી છે.શબ્દો તો એના એ જ હોય છે પણ તમારા જેવા ના હાથે(કલમે) જયારે ચડે ત્યારે એની બને છે કવિતા.
    વાંચવાની અને ફરી ફરી વાંચી તેને મણવાની એનાથી પણ વધુ મઝા આવી.
    અજમા

    Reply

  34. vihang vyas’s avatar

    જનાબ,
    બહોત ખુબ, પ્રથમ ત્રણ અને અંતિમ શેર તો બહુ ગમ્યા.

    Reply

  35. niraj mehta’s avatar

    વાહ ખૂબ સરસ

    Reply

  36. Aman Chetan framewla’s avatar

    Dear Vivek Uncle,
    Today I show almost all Pictures on your site.
    Dady says you are avery good poet, I dont know more about poetry but I must say you are a great Photographer.
    I have one suggetion, can you add photo section in your index, so that we who love your photography can directly see all your pictures.
    thanks in advance,
    Regards,
    Aman Chetan framewala

    Reply

  37. ખુબ જ સરસ

    Reply

  38. વિવેક’s avatar

    પ્રિય અમન,

    તારા પ્રસ્તાવ બદલ આભાર… ફોટોગ્રાફીનો અલગ વિભાગ બનાવી શકાય પણ મારા ખ્યાલથી એ ખૂબ સમય માંગી લે એવું કામ છે… છતાં વિચાર કરીશ…

    આભાર!

    Reply

  39. Rina’s avatar

    છાતીના ઓરડામાં ડૂમાઓ કાયમી ઘર જમાવી બેઠા છે,
    બારી સહુ મુશ્કેટાટ બંધ સદા, ખુલે બસ, બારણાં જળાશયમાં

    પાણી પાણી જ હોય છે એ છતાં, પાણી પાણીમાં છે ફરક કેવો ?
    માપસરનું મળત તો વૃક્ષ બનત, કાષ્ઠ કોહી ઊઠ્યાં જળાશયમાં.
    Awesome….

    Reply

  40. urvashi parekh.’s avatar

    ખુબજ સરસ.
    પાણી પાણી જ હોય છે એ છતા,માપસર નુ મળત તો વ્રુક્શ બનત,કાષ્ટ કોહી ઉઠ્યા જળશય માં,
    અને છાતી ન ઓરડા માં ડુમાઓ નુ રહેવુ,સરસ.

    Reply

Reply

Your email address will not be published. Required fields are marked *